Doorzoek het forum
Zoeken met Startpagina
Startpagina Thema's
Ron B.
Ope brief aan mnr. Carl Niehaus
Feb 23 2009 11:38:26:623AM - (SA)
Johann Marx van Roodepoort het dié volgende ope brief aan mnr. Carl Niehuas, gewese ANC-woordvoerder geskryf:
Meneer Niehaus,
In die lig van die benarde finansiële posisie waarin u uself bevind maak ek graag die volgende voorstelle om u situasie om te keer.
Hier neffens ons is die Zandspruit Informele Nedersetting. U kan ontslae raak van daardie R50 000,00 per maand monstrositeit waarin u en mevrou woon, en u kan ‘n sinkhuis tussen u kiesers kry vir ongeveer R400,00 per maand. Soos u weet gee die regering waarvan u deel is ’n klein bietjie gratis water en elektrisiteit aan persone in dieselfde geldlose situasie as waarin u uself bevind.
U kan ook onmiddelik van u luukse voertuie ontslae raak. Taxi's en busse van Zandspruit na die middestad is ongeveer R27 per rit. Indien u sou siek word is daar 'n kliniek in Zandspruit (met natuurlik geen voltydse dokter, verpleegster of medikasie nie). . . maar gelukkig is die Helen Joseph Hospitaal nie te ver van hier af nie (U sal net self die trappe moet klim na die boonste verdiepings toe want die hysbakke daar werk nie, en daar is nie meer rystoele nie). U sal natuurlik ook u eie beddegoed moet saamneem.
U en mevrou se kinders kan na die naaste publieke skool te gestuur word, waar die skoolgelde ongeveer R25 per kwartaal is, en u boonop vir “afslag” kan onderhandel. Die kwaliteit van opvoeding daar is sekerlik ook vir u en u kinders aanvaarbaar aangesien u regering dit vir die res van die populasie aanbeveel. . . en dis die mense wat uit die aard van die saak die ANC aan bewind geplaas het, en u en ander ampsdraers se uitspattige salarisse betaal. . . en NIKS daarvoor terug verwag nie.
Die Honeydew Polisie stasie se personeel sal u veiligheid waarborg (soos per die konstitusie), en as u toevallig ‘n slagoffer word sal hulle ’n verskoning uitdink hoekom dit gebeur het, en volgens die Bathopele White Paper vir u om verskoning vra as “restitusie en kompensasie” vir die ongerief wat u ervaar omdat niemand die saak ondersoek, of engie arrestasies gemaak word, of enige van 'n gesteelde items ooit terug gevind word nie. Sekerlik sal u verstaan dat die polisie nie “onmiddellik” kan reageer op u telefoon oproep indien u beroof word nie, want hulle enigste werkende voertuig is besig om die skof wat “af” gaan weg te bring huistoe en die “nuwe skof” te gaan haal anders is daar niemand by die polisie stasie nie. . . en dit kan nie deug nie.
U hoef u nie te bekommer oor enige nagevolge van u korrupte dade nie. . . solank u opreg voorkom terwyl u verduidelik hoekom u genoodsaak was om geld te steel. “I was poor” is nogal ‘n goeie stelling wat gereeld gehoor word. Indien u egter tot verantwoording geroep word, is tronkstraf nie so ’n slegte idee nie. Gratis kos, behuising, sosiale interaksie, gratis studie en mediese sorg terwyl u daar is. . . en dit juis terwyl u nie kan uitkom met u salaris nie.
Soos met die huidige en vorige Presidente van Suid-Afrika is tronkstraf nie eintlik meer ‘n skande nie, maar eerder ’n prestasie wat op 'n Curiculum Vitae breedvoerig verduidelik sal word vir toekomsverwysing. U mag dalk selfs benoem word as kandidaat vir die volgende Presidentsverkiesing. Dink daaroor, President Carl Niehaus. Klink nogal indrukwekkend!
Intussen sal die gemiddelde belastingbetaler onverpoosd harder werk en meer belasting betaal sodat die regering die nodige fondse kan bekom om u opgehoopte skuld af te skryf (nadat dit onder die tafel deur betaal is, hetsy in kontant of met ‘n goedgekeurde kontrak nadat u “skuldeisers” op ’n deursigtige manier getender het daarvoor). U weet mos, u was daar. Ons kan dit amper selfs laat klink soos 'n projek van die Gautengse Ekonomiese Ontwikkelingsagentskap, met u goedkeuring natuurlik.
Ek hoop die riglyne kan u help. Ek moet ongelukkig nou gaan werk sodat ek belasting, BTW, skoolfonds, munispale rekeninge, medies, pensioen, petrol, rentekoersverhogings, huispaaiement, voertuiglisensies, tolgeld, spoedboetes en dies meer kan betaal. Ek het ongelukkig geen kontakte by wie ek geld kan leen op die “never-never” boekie nie. Ek kan ongelukkig ook nie skuil agter die geykte en nou al afgesaagde “Dis Apartheid se skuld” (regtig!!) soos u nie.
Groetnis,
Johann Marx
Roodepoort
